Kultura Sailak jakinarazi duenez, dagoeneko parte har daiteke Madalenetako XXVIII. Kartel Lehiaketan, eta hala egin nahi duenak lanak hilaren 28a baino lehen entregatu beharko ditu udaletxeko erregistro orokorrean lanaren argazkia duen CD batekin batera.

Epaimahaia ekainaren 4ean elkartuko da erabakia hartzeko, 12:00etan, udal areto nagusian. Erabakitzen duen lanaren egileak 1.050 euroko saria eramango du.

Lehiaketako oinarriak udaletxean, kulturgunean nahiz Errenteriako Udalaren webgunean kontsulta daitezke.

Udal Kirol Patronatuak kirol ikastaroak antolatu ditu 3 urtetik gorako haurrentzat udarako: Uda Kanpaina. Horien asmoa da “eskolaumeei hastapen eta perfekzionatze ikastaro batzuk ematea, kirol jarduerak praktika ditzaten, eta ikasturtean zehar egindako jardueren osagarri izan daitezen”, azaldu du patronatuak.

Jaiak direla eta, lehen txanda ekainaren 25ean hasiko da, eta hamar saiokoa izango da gainontzekoak bezala.

Fanderia eta Galtzarabordako kiroldegian egingo dituzte ekintzak. Lehenengoan, igeriketa, multijarduera, dantza eskola, padela eta tenisa ikasi ahal izango dute, eta bigarrenean berriz, kirol kanpusa, kirol udalekuak, dantza eskola, igeriketa, patinak eta tenisa.

Kirol kanpusean futbola izango da kirol nagusia, eta kirol udalekuetan, berriz, kirol hastapenerako jarduerak eta joko tradizionalak.

Izen ematea

Interesa duten abonatuek dagoenek eman dezakete izena, eta Errenterian erroldatuta daudenek, berriz, astelehenetik aurrera. Gainontzekoek asteazkenera arte itxaron beharko dute.

Informazio gehiago Fanderia (943 34 44 23) nahiz Galtzarabordako (943 44 96 90) kiroldegietako harreran eta kirol patronatuko webgunean.

Erakusketa berri bat jarri dute Gaztelu ostatuan: Agustin Diaz de Islaren margolanak. Olioan egindako lanak dira, eta erretiroa hartu zuenean hasi zen margotzen. Gazteluk jakinarazi duenez, autodidakta da, eta era guztietako gaiak lantzen ditu: itsaso paisaiak, bodegoiak… Ekaina bukaera arte egongo da martxan.

Erraldoi eta buruhandien erakusketa hartu dute herriko 40 saltokik, ekainaren 17ra arte. Jose Luis Insaustiren ekimenez, Errenkoalde merkaritza elkarteak antolatu du erakusketa, eta bertan, 130 erraldoi eta buruhandiren miniaturak eta 225 argazki ikus daitezke. Miniaturak Insaustik berak 90. hamarkadatik hona bildutakoak dira, hainbat herritan, eta azaldu duenez, “Errenkoalde eta nire familiaren laguntzari esker, betidanik izan dudan ametsa bete dut erakusketa honekin”.

Landare elkarteak 26.enez antolatu du Haur Mailako Aurresku Txapelketa, eta aurtengoan 27 dantzari ariko dira lehian: hamalau A sailean (7 eta 11 urte artekoak) eta hamahiru B sailean (12 eta 15 urte artekoak). Etzi izango da lehia, 18:00etatik aurrera, Errenteria Hiria Kulturgunean.

A saileko haurrek bi dantza egin beharko dituzte, Alpargata eta agurra, eta B saileko haurrek, berriz, desafioa eta zortzikoa. Epaimahaia izango dute aurrez aurre, hiru kidek osatutakoa: Xabier Mendizabal Euskal Dantzarien Biltzarreko presidentea eta Nagore Indakoetxea eta Iñigo Oiarbide dantzariak.

Bukaeran, sariak banatuko dituzte, eta bi kategorietako dantzari onenei txapela eta gerrikoaz gain, Landare elkartearen saria emango diete. Horrez gain, ligaxkako garaileak ere sarituko dituzte —A mailan Aitor Lasa hernaniarra eta B mailan Aimar Odriozola ibartarra—, eta baita ligaxka horretan toki onenean geratu den herritarra ere, kasu horretan, Beñat Salegi.

Parte hartuko duten haurrak abendutik hasi eta apirilera arte egindako ligaxkan hoberen sailkatutakoak dira. Txapelketaren hastapenean, bi egunetakoa izaten zen lehia: lehenengoan aukeraketa bat egiten zuten, eta bigarrengoan, berriz, hamar onenen artean jokatzen zuten finala, Juantxo Maia Landare elkarteko kideak azaldu duenez.

Parte hartzaile asko zirela eta horrek antolakuntzari ezartzen zizkion trabak kontuan hartuta, Gipuzkoako Euskal Dantzarien Biltzarrarekin jarri ziren harremanetan, eta Gipuzkoan zehar ligaxka bat egitea erabaki zuten, eta gero finalak Errenteria-Oreretan egitea.

Horrenbestez, Errenteria-Oreretako finala jokatu aurretik Gipuzkoako zein Nafarroako hainbat herritatik pasatu dira etzi taularatuko diren dantzariak: Legazpi, Oiartzun, Beasain, Altsasu, Villabona eta Ibarra.

1986an antolatu zuen Landarek lehen aldiz Haur Mailako Aurresku Txapelketa. Abiapuntua izan zen Pasaian jokatzen den Euskal Herriko Aurresku Txapelketatik beherako mailarik ez zegoela, eta horrenbestez, Gipuzkoako txapelketa antolatzen hastea erabaki zuten. Landarek hainbat ekimen antolatzen ditu,  baina hori da zaharrenetako bat.

Soka dantza
Aurresku Txapelketaz gain, beste ekitaldi bat ere antolatu dute etzirako: goizean Ereintza dantza taldeko neskek soka dantza egingo dute. Hamabi dantzarik desfilea egingo dute dantza eskolatik hasi eta Zumardiraino. 12:30erako iristea espero dute.

Egitaraua

• 12:30. Soka dantza Zumardira iritsiko da.
• 18:00. Haur Mailako Aurresku Txapelketa, kulturgunean.