2012/05/18
Bertso eta musika uztartuko dituzte ostiraleko Bertshow ikuskizunean, Arkaitzan. Lau bertsolari igoko dira taula gainera: Arkaitz Oiartzabal Xamoa, Jon Martin, Jokin Labayen eta Manex Mujika, eta zuzeneko musikak zuzenduko die doinua. Sierra eta Ima ariko dira musika jotzen. Era berean, ingurura moldatu beharko dute bertsolariek. Xenpelar Bertso Eskolak eta Lau Haizetara Euskaldunon Elkarteak antolatu dute ekimena.
Udal Kirol Patronatuak jakinarazi duenez, kirol nutrizioari buruzko hitzaldia emango dute, ostiralean, 17:30ean, Galtzarabordako kiroldegian. Ruben Reyesek emango du hitzaldi hori, Serviocio Fanderia eta Galtzarabordako kirol instalazioetako kirol teknikariak.
Hitzaldian kirolari batentzat lagungarri izan daitezkeen laguntza ergogenikoei buruz ariko dira: kirola egiteko har daitezkeen osagarriak aipatuko dituzte eta beren onurak eta aukerak aztertu. Hitzaldira joateko aurretik izena eman behar da Galtzarabordako zein Fanderiako kiroldegietan. Plazak mugatuak direla aurreratu dute, eta gehienez, hogei lagunek eman dezaketela izena.
Bihar, 08:30etik 11:30era, ura moztuko dute Beraungo hainbat etxetan. Zehazki, 17. ataritik hasi 27. ra arteko etxebizitzei eragingo die. Ur hoditerian eta giltzan egin behar dituzten aldaketa batzuk dira mozketaren arrazoia. Aldez aurretik barkamena eskatu du udalak eragozpenengatik.
2012/05/17
Umberto Giordanoren Andrea Chenier opera emango dute, bihar, Niessen Zinemetan. Zuzeneko emanaldia izango da, Bregenz Festivaletik emango dutena. Sarrerak Errenteria Hiria Kulturguneko leihatilan daude salgai 15 (orokorra) eta 12 (murriztua) euroan; 11, 50 euroan eros dezakete T-club-eko kideek. Hector Sandoval, Scott Hendricks, eta Norma Fantini dira abeslariak.
2012/05/16
Blues zaleek zita daukate etzi, 22:30, De Cyne Reynan. White Towels taldea igoko da oholtzara, eta antolatzaileek jakinarazi dutenez, “bluesa ulertzeko duen moduak ez du inor epel utziko”. Bost kide ditu taldeak: Carlos Malles (bateria), Javi Zarranz (baxua), Alberto Cosgaya (gitarra), Kixki (armonika), eta Lisi Garcia (ahotsa).
Gaurtik hasi eta ekainaren 7ra arte ate irekiko jardunaldiak izango dira Oarsoaldea Igeriketa Kirol Elkarteak antolatuta. Horrenbestez, interesa duten umeek igeriketa taldearekin entrenatzeko aukera izango du. Parte hartzeko, zuzendaritza[a bildua]oarsoaldeaike.com helbidera idatzi behar da haurraren datuak eta zein egunetan joatea gustatuko litzaiokeen zehaztu behar dira.
Erraldoi eta buruhandien erakusketa hartu dute herriko 40 saltokik, ekainaren 17ra arte. Jose Luis Insaustiren ekimenez, Errenkoalde merkaritza elkarteak antolatu du erakusketa, eta bertan, 130 erraldoi eta buruhandiren miniaturak eta 225 argazki ikus daitezke. Miniaturak Insaustik berak 90. hamarkadatik hona bildutakoak dira, hainbat herritan, eta azaldu duenez, “Errenkoalde eta nire familiaren laguntzari esker, betidanik izan dudan ametsa bete dut erakusketa honekin”.
2012/05/14
Astelehenetan Zumardian egiten duten merkatuarekin batera, eskulangintza tailerrak egingo dituzte datozen asteetan. Hain zuzen, astelehenean bertan izango da lehenengoa. Zurezko jostailuak, metalizatutako hosto naturalak eta larrua dira tailerren gaiak; eta horrenbestez, larruzko zorroak, gerrikoak, apaingarriak, bitxiak eta bestelako elementuak nola egiten diren ikasiko dute.
Jon Txasko Errenteriako Ogasuneko zinegotziak jakinarazi duenez, ekimen horren bidez, eskulangintzari balorea eman nahi diote.
Erakusketa berri bat jarri dute Gaztelu ostatuan: Agustin Diaz de Islaren margolanak. Olioan egindako lanak dira, eta erretiroa hartu zuenean hasi zen margotzen. Gazteluk jakinarazi duenez, autodidakta da, eta era guztietako gaiak lantzen ditu: itsaso paisaiak, bodegoiak… Ekaina bukaera arte egongo da martxan.
2012/05/13
Igandean sinadurak bilduko dituzte herrian etxe kaleratzeen kontra. Mahaiak 10:00etatik 13:00etara egongo dira jarrita Galtzarabordako udal kiroldegian. Ereintza eskubaloiaren partiduen harira jarriko dituzte mahaiak bertan.
Herri Ekimen Legegilea da, eta Espainiako Estatuan ari dira sinadurak biltzen. Horren bidez, etxe kaleratzeen kasuetan hipoteka etxebizitzarekin ordaintzea nahi dute; alegia, bezeroak behin etxebizitza entregatuta bankuarekiko dituen zor guztiak amaitutzat ematea, “horrela bizitza berria has dezan”. Ekimenaren sustatzaileek jakinarazi dutenez, 500.000 sinadura lortu behar dituzte urriaren 31 baino lehen, Espainiako Diputatuen Kongresura eman eta hipoteken legearen aldaketa ahalbidetzeko.
Hipoteka etxebizitzarekin ordaintzeaz gain, etxe kaleratzeak gelditzeko eskatuko dute, eta baita alokairu soziala bultzatzea ere.
Oarso Bidasoko Hitza
Errenteriako Hitza
Aizpea Amas
Iker Vidal
Ikerne Zarate